شادی کے دن شہزادی بننے کا خواب
لڑکی جس دن کا سب سے زیادہ انتظار کرتی ہے وہ اس کی شادی کا دن ہوتا ہے۔ اس اہم ترین دن کے لیے اس نے انگنت خواب اپنی آنکھوں میں سجا کر رکھے ہوتے ہیں، شدید ترین بے چینی اور بے تابی اس وقت بڑھ جاتی ہے جب اس خاص دن کیلئے تیاریوں کا سلسلہ شاپنگ سے شروع ہوتا ہے۔ مگر جہیز، کپڑوں اور دیگر لوازمات جمع کرتے ہوئے اس اہم پہلو کو فراموش نہ کریں کہ آپ کی جلد اور بالوں کو بھی مناسب توجہ کی ضرورت ہے کیونکہ بہرحال آپ کو دلہن ایک مرتبہ ہی بننا ہے اور اس خاص دن کیلئے ہر لڑکی کے ذہن میں یہ تصور ہوتا ہے کہ وہ کسی ملکہ یا شہزادی کی مانند محسوس ہو۔ اس اہم پہلو کو ملحوظ خاطر رکھتے ہوئے ہم نے دلہن بننے والی لڑکیوں کیلئے کچھ خاص ٹپس یہاں جمع کی ہیں:
خوبصورتی میں اضافے کی کوششیں
٭ اس بات کا فیصلہ بہت پہلے ہی کرلیں کہ آپ کو میک اپ کیلئے کس کا انتخاب کرنا ہے جو کہ مقررہ وقت سے پہلے ہی آپ کی خوبصورتی میں اضافے کی کوششیں شروع کردے، جسے خود کو آرگنائز کرنے میں اچھی مدد مل جائے گی اور وہ ضروریات کو مدنظر رکھتے ہوئے کام کرسکے گی۔ یہ چیز اس لحاظ سے بڑی اہمیت کی حامل ہے کہ وہ نہ صرف آپ کے بالوں کی آرائش، میک اپ اور لباس کی ترجیحات سے واقف ہو جائے گی بلکہ آپ کو ایک شخصیت کے طور پر جاننے کی کوشش بھی کرےگی۔
بیوٹی پارلر جانے سے پہلے جلدی امراض سےنپٹیں
٭اگر آپ کو شدید نوعیت کی مہاسوں یا جلدی امراض کی کوئی دوسری مشکل لاحق ہے تو بیوٹیشن کے پاس جانے سے پہلے کسی ماہر ڈاکٹر کا رخ کریں کیونکہ عام طور پر مہاسوں کی اہم ترین وجہ نظام ہضم کی خرابی ہوتی ہے۔جلد کی حفاظت کا آغاز! قدرتی مصنوعات سے کیجئے:٭اپنی جلد کی حفاظت کا آغاز معمول کے مطابق کلینزنگ سے کریں اور چہرے پر قدرتی مصنوعات سے تیار کردہ کوئی آمیزہ لگائیں جیسے کہ دہی، بیسن، ہلدی، شہد، دودھ اور لیموں کا رس وغیرہ البتہ اس سے پہلے کسی ہلکے فیس واش سے چہرے کو اچھی طرح صاف کرلیں۔صندل!دوبارہ جوان کردینے والا فیس ماسک:٭جب آپ شاپنگ کی مصروفیات سے چھٹکارے کے بعد گھر واپس لوٹیں تو چہرہ صاف کرکے اس پر صندل کی لکڑی کا پیسٹ لگائیں جو کہ آپ کو دوبارہ جوان کردینے والا فیس ماسک ثابت ہوگا۔شادی سے تین ماہ پہلے یہ چیزیں نہ کھائیں:٭شادی سے کم و بیش تین ماہ قبل جنک فوڈز اور تلی ہوئی چیزوں کااستعمال ترک کردیں۔
ٹوٹکہ آزمائیے! بالوں کی چمک دمک بڑھ جائیگی
٭باہر نکلتے وقت بالوں کی حفاظت کیلئے اسکارف یا کیپ پہننا نہ بھولیں جبکہ ہفتے میں تین مرتبہ اچھے شیمپو اور کنڈیشنر کااستعمال بھی لازمی ہے۔ اس کے ساتھ ہی نیم گرم کئے ہوئے تیل کی مالش ہر چند روز کے بعد کی جائے تو اس سے بالوں کی چمک دمک اور رونق قائم رہے گی۔ بالوں کی جڑوں کو مضبوط اور خشکی سے پاک رکھنے کیلئے انڈے کی زردی سے بہتر کوئی چیز نہیں ہے جسے سر پر اچھی رگڑ کر لگائیں تو بال چمکدار بھی رہیں گے اور یہ انتہائی مفید کنڈیشنر بھی ہے۔